Վերջերս Microsoft ընկերությունը ներկայացրեց Skype-ի նորացված տարբերակը, որը համալրվել էր ձայնային օնլայն թարգմանչի գործառույթով: Այժմ նման ծառայություն է առաջարկում նաև Google-ը: 

Ինչպես տեղեկացնում է The New York Times-ը, մոտ ապագայում Google ընկերությունը մտադիր է գործարկել Google Translate Android հավելվածի նոր տարբերակ, որը հատուկ համակարգի միջոցով օգտատիրոջ խոսքը իրական ժամանակում թարգմանում է մի լեզվից մյուսը: 

Ձայնային օնլայն թարգմանչից զատ ընկերությունը ներկայացնելու է ևս մեկ նոր ֆունկցիա, որը հնարավորություն է տալու սմարթֆոնի տեսախցիկի միջոցով տեքստեր թարգմանել: Թե երբ է Google-ը պաշտոնապես ներկայացնելու այդքան սպասված նոր ֆունկցիաները, առայժմ հայտնի չէ: Մնում է միայն հուսալ, որ երկար սպասելու անհրաժեշտություն, ամեն դեպքում, չի առաջանա: