Samsung ընկերությունն իր «խելացի» ակնոցների համար որպես ստեղնաշար առաջարկում է օգտագործել օգտատերերի ձեռքի ափերը: Ակնոցների միջոցով օգտատերը կկարողանա տեսնել վիրտուալ ստեղնաշարը` արտացոլված ձեռքի մատների վրա: Այսպիսով, Samsung «խելացի» ակնոցների միջոցով հաղորդագրության տեքստը հնարավոր կլինի հավաքել ինչպես ձայնային տվյալների ճանաչման, այնպես էլ վիրտուալ ստեղնաշարի միջոցով:

Վիրտուալ ստեղնաշարը մատների վրա արտացոլվում է սարքավորման տեսախցիկի մեջ տեղադրված հատուկ պրոյեկտորի միջոցով, որի արտոնագիրն ընկերությունն արդեն ձեռք է բերել: Վիրտուալ տառերի դասավորությունը, կախված կարգավորումներից և ձեռքի ափի դիրքից, հնարավոր է փոփոխել:

Հաղորդագրության տեքստը հավաքելու համար անհրաժեշտ է ընդամենը բութ մատով սեղմել ձեռքի ափին արտացոլված վիրտուալ կոճակները: Կարելի է օգտագործել ինչպես QWERTY-ստեղնաշարը, այնպես էլ հեռախոսային T9 տարբերակը:

Սպասվում է, որ Samsung ակնոցները պաշտոնապես կներկայացվեն սեպտեմբերին Բեռլինում կայանալիք IFA ցուցահանդեսի շրջանակներում: Սարքավորումը ծառայելու է որպես նվագարկիչ, ինչպես նաև էկրանին հայտնվելու են օգտատիրոջ սմարթֆոնի բոլոր ծանուցումները: