Ազգությամբ հնդիկ երկու դեռահասներ WhatsApp հաղորդակցման հարթակում խոցելիություն են հայտնաբերել: Նրանք պարզել են, որ ընդամենը մեկ հաղորդագրություն ուղարկելու միջոցով զրուցակցի սմարթֆոնում կարելի է անջատել հավելվածը: 

Երիտասարդները պարզել են, որ զրուցակցին 2000 հատուկ սիմվոլներից բաղկացած հաղորդագրություն ուղարկելու միջոցով կարելի է խափանել WhatsApp-ի աշխատանքը: Դա նշանակում է, որ ամեն անգամ, երբ հասցեատերը փորձի բացել հաղորդագրությունը, հավելվածն ավտոմատ կերպով կանջատվի: Հաղորդագրությունը պարունակում է ընդամենը 2 կբ տեղեկատվություն և հասանելի է Pastebin պորտալում: 

Սակայն ինչպես ցանկացած թույն, այս «մահացու» հաղորդագրությունը ևս ունի իր հակաթույնը: Որպեսզի բջջային հավելվածը շարունակի աշխատել, պետք է պարզապես ջնջել հաղորդագրության հեղինակի հետ ողջ խոսակցությունը, քանի որ միայն տվյալ հաղորդագրությունը ջնջելն անհնար է: 

Նշենք, որ այս խոցելիությունն առկա է միայն Android օպերացիոն համակարգում: iOS սարքերին որևէ վտանգ չի սպառնում: