May 2025
M	T	W	T	F	S	S
	1	2	3	4
5	6	7	8	9	10	11
12	13	14	15	16	17	18
19	20	21	22	23	24	25
26	27	28	29	30	31

Code

29/05/2014 11:51

Կոտրվել է Avast-ի ֆորումը. 400 000 օգտատիրոջ տվյալներ հասանելի են հաքերներին

Հակավիրուսային ծրագրերի մշակմամբ զբաղվող Avast ընկերության քննարկումների հարթակը ժամանակավորապես անհասանելի է: Հայտնի է դարձել, որ Avast-ի ֆորումը կոտրվել է, և հաքերների մոտ են հայտնվել ֆորումում գրանցված օգտատերերի տվյալները, իսկ դրանց թիվը հասնում է 400 000-ի:

Ընկերության տնօրեն Վինսենթ Սթեքլերը նշել է, որ հաքերների ձեռքում են հայտնվել օգտատերերի անունները, էլեկտրոնային փոստի հասցեները և ծածկագրերը: Չնայած այն բանին, որ ծածկագրերը գաղտնագրված են, կա հնարավորություն, որ հաքերները կկարողանան գաղտնազերծել դրանք, այս իսկ պատճառով Սթեքլերը խորհուրդ է տվել ֆորումի մասնակիցներին այլ հարթակներում փոխել իրենց ծածկագրերը, եթե իհարկե դրանք համընկնում են ֆորումում ունեցած ծածկագրի հետ:

Avast-ում նշում են, որ հարձակման թիրախ է դարձել միայն ֆորումը, որը գործում էր իրենց համակարգից առանձին: Նշվում է, որ ֆորումի հիմքում ընկած է այլ ընկերության կողմից պատրաստված ծրագրային հարթակ:

Մեր կողմից նշենք, որ անվտանգությամբ զբաղվող ընկերության հարթակի կոտրումը ամենածանր հարված է, որ կարելի է հասցնել սույն ոլորտի ընկերություններին, և իհարկե այստեղ չի օգնի այն հայտարարությունը, որ հարթակն իրենցը չի եղել: