Հայաստանի ուժեղ տեխնոլոգիական միջավայրը, ակտիվ ձեռնարկատիրական համայնքը և նոր ֆինանսական գործիքների նկատմամբ աճող հետաքրքրությունը երկրի թվային ակտիվների շուկայի զարգացման կարևոր նախադրյալներ են։ Այս մասին նշել է Binance-ի Կենտրոնական Ասիայի և Աֆրիկայի տարածաշրջանային ղեկավար Կիրիլ Խոմյակովը՝ անդրադառնալով Հայաստանի շուկայի հեռանկարներին, կարգավորող մարմինների հետ երկխոսությանը և բլոկչեյնի կիրառման հնարավորություններին։

Խոմյակովի խոսքով՝ Հայաստանի նկատմամբ հետաքրքրությունը պայմանավորված է տեխնոլոգիական կարողությունների և օգտատերերի պահանջարկի համադրությամբ։ ՏՏ ոլորտը հիմք է ստեղծում նոր լուծումների մշակման համար, իսկ թվային ակտիվների նկատմամբ հետաքրքրությունը՝ դրանց գործնական կիրառման հնարավորություններ։

«Մեզ համար Հայաստանը հետաքրքիր շուկա է, որտեղ տեսնում ենք աճող պահանջարկ և թվային ակտիվների գործնական կիրառման ավելի ու ավելի շատ հնարավորություններ», – ընդգծել է նա։

Միաժամանակ Խոմյակովը նշել է, որ Binance-ի՝ որևէ շուկայում գործունեության զարգացման որոշումները հիմնվում են տեղական պայմանների ուսումնասիրության վրա։ Ընկերությունը նախ գնահատում է օգտատերերի կարիքները, ֆինանսական համակարգի առանձնահատկություններն ու կարգավորող միջավայրը, ապա որոշում հետագա քայլերը։

«Մենք շուկան չենք զարգացնում պարզապես այնտեղ ներկայություն ունենալու համար։ Մենք ուսումնասիրում ենք օգտատերերի կարիքները, տեղական ֆինանսական համակարգը և կարգավորող միջավայրը, ապա դրանց հիման վրա որոշում հաջորդ քայլերը», – ասել է նա։

Անդրադառնալով Հայաստանի կարգավորող մարմինների հետ երկխոսությանը՝ Խոմյակովը շեշտել է, որ ընկերությունը կարգավորումը համարում է հասուն շուկայի անհրաժեշտ բաղադրիչ և պետական մարմինների հետ համագործակցում է սահմանված ընթացակարգերի շրջանակում։ Այս գործընթացում Binance-ն իր դերը տեսնում է մասնագիտական փորձի փոխանակման մեջ։

«Մենք չենք սահմանում կանոնները, բայց կարող ենք կիսվել մեր փորձով», – նշել է նա։

Խոմյակովի խոսքով՝ տարբեր կարգավորվող շուկաներում աշխատանքը ընկերությանը հնարավորություն է տվել գործնական փորձ կուտակել կարգավորող պահանջներին համապատասխանության, անվտանգության ապահովման և ռիսկերի կառավարման ուղղություններով։ Binance-ը պատրաստ է այդ փորձը ներկայացնել մասնագիտական երկխոսության շրջանակում, եթե այն կարող է օգտակար լինել։

Հայաստանում ոլորտի հետագա զարգացման հնարավորությունները գնահատելիս Խոմյակովը կարևորել է նաև մասնագիտական ներուժը։ Նրա կարծիքով՝ երկիրն ունի տեխնոլոգիական հիմք՝ բլոկչեյնի և ֆինանսական տեխնոլոգիաների ոլորտներում կարողությունները զարգացնելու համար։ Հետագա առաջընթացը, սակայն, կախված է էկոհամակարգի զարգացումից, նոր նախագծերի ի հայտ գալուց և մասնագետների ձևավորումից։

Այս համատեքստում նա նշել է, որ Binance-ն ուշադիր հետևում է Հայաստանի շուկային, սակայն առայժմ չի ցանկանում խոստանալ ներկայության կոնկրետ ձևաչափեր, որոնք դեռ գոյություն չունեն։

Կայուն կրիպտոէկոհամակարգի ձևավորման համար Խոմյակովն առանձնացրել է չորս հիմնական բաղադրիչ՝ հստակ կանոններ, կրթություն, անվտանգ ենթակառուցվածք և մասնագետներ։ Դրանց հետ մեկտեղ նա կարևորել է տեխնոլոգիական լուծումների գործնական արժեքը․ առաջարկվող պրոդուկտները պետք է արձագանքեն մարդկանց իրական կարիքներին և լուծեն կոնկրետ խնդիրներ։

«Եթե տեխնոլոգիան գոյություն ունի միայն հանուն տեխնոլոգիայի, լայն շուկա չի ձևավորվի։ Օգտատերը պետք է հասկանա, թե ինչու է իրեն անհրաժեշտ այդ պրոդուկտը, և ինչ խնդիր է այն լուծում», – ընդգծել է նա։

Խոսելով կրիպտոարժույթներից բացի բլոկչեյնի այլ կիրառությունների մասին՝ Binance-ի տարածաշրջանային ղեկավարը Հայաստանի համար ուշադրության արժանի ուղղություններ է համարել թոքենացումը, միջսահմանային ֆինանսական ծառայությունները, թվային նույնականացումն ու տվյալների փոխանակումը։

Նրա խոսքով՝ այս ուղղություններից յուրաքանչյուրում տեխնոլոգիայի կիրառման նպատակահարմարությունը պետք է գնահատել դրա բերած գործնական արդյունքով՝ արդյոք այն օգնում է խնդիրը լուծել ավելի արդյունավետ, արագ կամ ավելի ցածր ծախսերով։

«Հիմնական հարցը պետք է շատ պարզ լինի՝ ո՞ր խնդիրն ենք բլոկչեյնի շնորհիվ լուծում ավելի լավ, ավելի արագ կամ ավելի ցածր ծախսերով։ Եթե այս հարցին համոզիչ պատասխան կա, ուրեմն կա նաև գործնական կիրառման իրական հնարավորություն», – եզրափակել է Կիրիլ Խոմյակովը։