Ինչպես հայտարարել է Facebook-ը, ԱՄՆ-ում բնակվող Facebook-ի օգտատերերն այսուհետ ծանուցումներ են ստանալու անհայտ կորած երեխաների մասին:

Ծանուցումներն ուղարկվելու են եկրի այն շրջաններում բնակվող օգտատերերին, որտեղ ենթադրաբար կարող է գտնվել երեխան: Ծանուցումները ներառելու են որոնումների համար օգտակար տեղեկատվություն՝ լուսանկարներ, նկարագիր և այլն: Տեղեկատվությունը կարող է վերաբերել ինչպես երեխային, այնպես էլ առևանգման մեջ կասկածվող անձին: Ծանուցումները հայտնվելու են օգտատիրոջ լրահոսում: Վերջինս, կիսվելով ընկերների հետ, կարող է տարածել տեղեկատվությունն ու նպաստել որոնողական աշխատանքների արդյունավետությանը: 

Կորած երեխաների մասին ծանուցումները երևալու են սոցիալական ցանցի ինչպես համակարգչային, այնպես էլ բջջային տարբերակներում: Ընդ որում՝ բջջային ծանուցումները կարող են շատ ավելի արդյունավետ լինել, քանի որ օգտատերերի մեծամասնությունն ավելի հաճախ Facebook է մուտք գործում բջջային սարքերից: