Հինգամյա Քրիստոֆեր Վոն Հասսելին միանգամայն պատահական կերպով հաջողվել է գտնել Xbox Live-ի անվտանգության համակարգի խոցելի օղակը: Համակարգի այդ բացթողումը թույլ էր տալիս յուրարաքանչյուր ցանկացողին անօրինական ճանապարհով մուտք գործել մեկ ուրիշի օգտահաշիվ:

Տղային դա հաջողվել է պատահաբար, երբ վերջինս փորձում էր մուտք գործել իր հոր օգտահաշիվ: Գաղտնաբառի դաշտում հինգամյա Քրիստոֆերը մի քանի անգամ սեղմել է «space» կոճակը, այնուհետև, սեղմելով «enter» կոճակը, հաստատել գաղտնաբառը: Արդյունքում փոքրիկը մի որոշ ժամանակ իր հոր օգտահաշվից խաղեր  խաղալու հնարավորություն է ստացել:

Երեխայի հայրն անմիջապես տեղեկացրել է այդ մասին Microsoft ընկերությանը, ինչից հետո համակարգի խոցելիության խնդիրը կարգավորվել է: Որպես մրցանակ Microsoft-ը Քրիստոֆերին չորս վճարովի խաղ, 50 ԱՄՆ դոլար կանխիկ գումար, ինչպես նաև Xbox Live-ում մեկ տարվա անվճար բաժանորդագրության հնարավորություն տվեց: