Նոյեմբերի 22-ից 23-ը Երևանում՝ «Ինժեներական քաղաք»-ի Բարձր տեխնոլոգիական աքսելերատորի տարածքում հաջողությամբ անցկացվեց կիբեռանվտանգության ամենամյա «Capture the Flag 2025» մրցույթը՝ այս տարի ներկայացնելով «AI APOCALYPSE» թեման։ Միջոցառումը միավորեց կիբեռանվտանգության ոլորտի մասնագետներին և ուսանողներին, ովքեր 24 ժամ շարունակ մրցեցին միմյանց հետ՝ հայտնաբերելով խոցելիություններ, ուսումնասիրելով վիրուսներ ու վնասակար ծրագրեր և լուծելով կիբեռանվտանգության ոլորտի արդիական խնդիրներ։

Մրցույթին մասնակցեց 56 թիմ՝ ավելի քան 250 մասնակից, լուծելով բարդ գործնական առաջադրանքներ, որոնք կապված էին արհեստական բանականության (AI) համակարգերի և դրանց անվտանգության խոցելիության հետ։ Միջոցառման հիմնական նպատակն էր բացահայտել նոր տաղանդներ, զարգացնել մասնակիցների վերլուծական մտածողությունն ու արագ արձագանքման հմտությունները, ինչպես նաև ամրապնդել ոլորտի մասնագիտական ներուժը։

Մրցակցային և ոգևորիչ 24-ժամյա պայքարից հետո հայտնի դարձան լավագույն թիմերը, որոնք ցուցաբերեցին բացառիկ հմտություններ և նորարարական մոտեցումներ։

AIN թիմը դարձավ մրցույթի հաղթող՝ հավաքելով ամենաշատ դրոշները, իսկ HIGH5 և LAPS թիմերը զբաղեցրին, համապատասխանաբար՝ 2-րդ և 3-րդ տեղերը։ Հաղթող թիմերը պարգևատրվեցին միջոցառման մրցանակների հովանավոր IDBank-ի և Idram-ի կողմից։ Բացի այդ, մասնակից այլ թիմեր ևս ստացան անակնկալ նվերներ՝ IDBank-ի և Idram-ի, Amio Bank-ի և Մայքրոսոֆթ ինովացիոն կենտրոն Հայաստանի կողմից։

«Ձեռնարկությունների ինկուբատոր» հիմնադրամի «ՍայՀաբ – Հայաստան» կիբեռանվտանգության նախաձեռնության ղեկավար և Մայքրոսոֆթ ինովացիոն կենտրոն Հայաստանի տնօրեն Մարի Բարսեղյանի խոսքով՝ այս տարվա «AI APOCALYPSE» թեման ընդգծում է արհեստական բանականության հետ կապված կիբեռանվտանգության մարտահրավերների աճող կարևորությունը։

«Կիբեռանվտանգության ոլորտի ներկայացուցիչների գործնական հմտությունների մշտական զարգացումը, ինչպես նաև ոլորտի նկատմամբ հետաքրքրվածության մեծացումը, ՁԻՀ-ի «ՍայՀաբ – Հայաստան» նախաձեռնության առանցքային ուղղություններից մեկն է։ Այդ նպատակով էլ արդեն 6-րդ տարին անընդմեջ կազմակերպում ենք CTF մրցույթը, որը դարձել է կարևոր հարթակ, որտեղ թիմերը սովորում են իրական մարտավարությունների միջոցով։ Մասնավորապես, «AI APOCALYPSE»-ի թեման հստակ ցույց տվեց, որ արհեստական բանականության մարտահրավերներն արդեն մեր իրականության անբաժանելի մասն են, իսկ մրցույթի հաջողությունն ապացուցեց, որ Հայաստանն ունի լավ կիբեռ սերունդ և զարգացման լայն հնարավորություններ ու ներուժ։ Շնորհակալ ենք նաև մեր գործընկերներին աջակցության համար։ Ուրախալի է, որ ոլորտի զարգացման հարցում առկա է նման համագործակցային մոտեցում»։

«Կիբեռանվտանգությունն այլևս միայն տեխնոլոգիական մարտահրավեր չէ, այլ ռազմավարական հրամայական, որը ներառված է թվային փոխակերպման բոլոր նախաձեռնություններում, գլխավորապես այն պատճառով, որ արհեստական ​​բանականության համակարգերը ավելի ու ավելի են ինտեգրվում մեր առօրյա կյանքում: Աջակցելով  «Capture the Flag 2025» մրցույթին EU4Innovation East ծրագիրը նպաստում է Հայաստանում կիբեռանվտանգության ոլորտի մասնագետների հաջորդ սերնդի ձևավորմանը: Տեխնիկական հմտություններից բացի, այս 24 ժամյա մրցույթը ցույց տվեց մասնակիցների մտքի ճկունությունը և քննադատական ​​մտածողությունը, որոնք անհրաժեշտ են ի հայտ եկող սպառնալիքներին դիմակայելու համար» – նշել է EU4Innovation East ծրագրի ղեկավար Ժյուլիեն Շմիթը:

«Ucom-ում մենք վստահ ենք, որ կիբեռանվտանգությունն այսօր ցանկացած տեխնոլոգիական էկոհամակարգի հիմքն է։ Արհեստական բանականության արագ զարգացումը դրա կարևորությունն ավելի է մեծացնում։ Հենց դրա համար է, որ նման նախաձեռնությունները պետք է շարունակական լինեն․ այստեղ է ձևավորվում այն միջավայրը, որտեղ երիտասարդ մասնագետները ստանում են իրական փորձ և վստահություն։ Մենք համոզված ենք, որ այսպիսի հմտություններ ունեցող մասնագետներն են ապահովում երկրի թվային առաջընթացը», – նշել է Ucom-ի գլխավոր տնօրեն Ռալֆ Յիրիկյանը։

Հիշեցնենք, որ միջոցառումն անցկացվում է «Ձեռնարկությունների ինկուբատոր» հիմնադրամի կողմից` իր «ՍայՀաբ – Հայաստան» կիբեռանվտանգության նախաձեռնության շրջանակում և «Ինժեներական քաղաք» ծրագրի հետ համագործակցությամբ, Եվրոպական Միության կողմից ֆինանսավորվող, Ֆրանսիայի կառավարության կողմից համաֆինանսավորվող և Expertise France-ի կողմից իրականացվող EU4Innovation East նախագծի աջակցությամբ։

Միջոցառման գործընկերներն են՝ Մայքրոսոֆթ ինովացիոն կենտրոն Հայաստանը, Հայաստանի կենտրոնական բանկը և Illuria-ն։

Միջոցառման իրականացմանն աջակցում են IDBank-ը և Idram-ը՝ որպես մրցանակների հովանավորներ, Amio Bank-ը՝ որպես Platinum հովանավոր, Ucom-ը՝ որպես ռազմավարական տեխնոլոգիական գործընկեր։