Վերջերս տեղի ունեցած Մեքսիկայի և Հոլանդիայի հավաքականների հանդիպումից հետո, երբ հոլանդացիները վերջին րոպեների ընթացքում կարողացան հաղթանակ տանել մեքսիկացիների նկատմամբ և հավաքականին դուրս թողնել առաջնությունից, հոլանդական KLM ավիաընկերությունը ռասիստական բնույթի մի թվիթ էր արել՝ վիրավորանք հասցնելով Մեքսիկայի ֆուտբոլի հավաքականի երկրպագուներին: 

Չնայած թվիթը րոպեներ անց ջնջվել էր՝ այն շատերի կողմից էր հասցրել նկատվել: Օգտատերերը պատասխան թվիթերում նշում էին, որ այլևս երբեք չեն օգտվելու KLM ավիաընկերության ծառայություններից: Իրենց գրառումներում օգտատերերը հրապարակավ մեղադրում էին ընկերությանը ռասիզմի մեջ ու դատապարտում մեքսիկացիների նկատմամբ նման անհարգալից վերաբերմունքը: 

Թերևս, ամենադիպուկ պատասխան հարվածը հասցրեց Aeromexico ընկերությունը: Իսպաներենից թարգմանաբար թվիթն այսպես էր հնչում. «Շնորհակալ ենք անկրկնելի խաղի համար: Հպարտ ենք ու սպասում ենք ձեր վերադարձին»: