Գնալով ավելի մեծ թվով ռեստորաններ և հասարակական սննդի այլ վայրեր են սկսում օգտագործել պլանշետները` հաճախորդներից պատվերներ ստանալու համար: Պատճառը շատ պարզ է` հաճախորդն ավելի արագ է պատվիրում և հետևաբար ստանում իր կերակուրը, իսկ գործատուն իր հերթին տնտեսում է աշխատավարձերի վրա: Պլանշետների ներդրման պատճառով մոտ ապագայում մենք այլևս էլ չենք տեսնի փոքր նոթատետրի մեջ արագ գրառումներ կատարող մատուցողների, որպես հետևանք շատ ու շատ մատուցողներ կկորցնեն իրենց աշխատատեղերը:

ԱՄՆ-ում բնակչության 7%-ն արդեն պատվերներ է տալիս պլանշետների օգնությամբ, ևս 40% կողմ է նման տեխնոլոգիաների ներդրմանը: Մասնագետները նշում են, որ այսօրվա հասկացությամբ մատուցողներ կմնան միայն բարձր կարգի ռեստորաններում, իսկ արագ սննդի կետերում կամ պիցերիաներում, որտեղ մարդիկ պարզապես սնվում են, նրանց կփոխարինեն պլանշետները:

Պլանշետներն օգտագործվում են ոչ միայն պատվերներ ընդունելու, այլ նաև գումարը վճարելու համար: Սակայն դա ևս ամենը չէ, արտադրողների կողմից նման պլանշետներում ներդրվում են խաղեր, սոցիալական ցանցերում շփվելու ֆունկցիաներ և այլ օգտակար գործիքներ: