Մադրիդի պոլիտեխնիկական համալսարանի գիտնականները Ilía Sistemas ընկերության մասնագետների հետ համատեղ աշխատում են կենսաչափական իդենտիֆիկացիայի նոր տեխնոլոգիայի մշակման վրա, որի միջոցով մարդկանց հնարավոր կլինի ճանաչել մարմնի հոտի միջոցով: Փորձագետները նշել են, որ ցանկացած մարդ ունի միայն իրեն բնորոշ հոտ, որը ժամանակի ընթացքում գրեթե չի ենթարկվում փոփոխության: Դա 85% հնարավորություն է տալիս ամբոխի մեջից ճանաչելու մարդուն:

Նոր տեխնոլոգիան, որի վրա գիտնականներն այժմ աշխատում են, մի քանի անգամ կմեծացնի կենսաչափական իդենտիֆիկացիայի հնարավորությունները: Այսպիսով, մարդկանց հնարավոր կլինի ճանաչել առանց ավելորդ գործընթացների, ինչպիսին է, օրինակ, մատնահետքերի սկանավորումը:

Սակայն այստեղ մի հարց է առաջանում` արդյոք օծանելիքի բույրն ազդում է իդենտիֆիկացիայի ճշգրտության վրա: Այս հարցին մասնագետները պատասխան դեռևս չեն տվել:

Հարկ է նշել, որ մարդուն հոտի միջոցով ճանաչելու այս գաղափարը նոր չէ: Տարիներ շարունակ ոստիկանությունը շների միջոցով է հայտնաբերել և ձերբակալել հանցագործներին: Շներն իրենց հոտառության միջոցով`անկախ կլիմայական և աշխարհագրական պայմաններից, կարողանում են նույնիսկ տասնյակ կիլոմետրեր հեռավորության վրա գտնել մարդկանց`ընդամենը հոտոտելով նրանց պատկանող որևէ իր:

Այնուամենայնիվ, մինչև բոլորովին վերջերս չկար մշակված մի տեխնոլոգիա, որի միջոցով մարդիկ շներին հատուկ ճշտգրտությամբ կկարողանային  տարբերել մարդկանց հոտերը: Այդ հարցում օգնության հասան Ilía Sistemas ընկերության մասնագետները:

Փորձարկումների արդյունքում պարզ է դարձել, որ 100 դեպքերից  85-ի ժամանակ հնարավոր է ճանաչել մարդուն իր մարմնի հոտով: Ընդ որում, կարևոր չէ, որ մարդու քրտինքի հոտը կարող է փոխվել ինչ-որ հիվանդության, սննդակարգի փոփոխության կամ որևէ այլ պատճառով: